Hoxe é venres 13; mañá, Entroido e San Valentín. Que cada quen elixa no que crer. Nós farémolo no noso equipo, que recibe ó Melilla Torreblanca, líder da Primeira División (sábado, 11h). O partidazo da xornada, en directo por RTVE Play, podería levarnos ó máis alto da táboa se logramos vencer.

Cunha xeira de seis vitorias consecutivas (pleno en 2026), alcanzamos o segundo chanzo da clasificación, con 37 puntos. Temos 6 de vantaxe sobre o primeiro equipo exento do playoff (o Futsi, rival da seguinte semana). Ademais, estamos igualadas co propio Melilla (teñen un partido menos). En casa conseguimos dous dos seis triunfos recentes, ante rivais complicados como Castro e Roldán. Para a vindeira proba de nivel na Seca contamos con todo o plantel, agás Miri.

No lado melillense enlazan tres vitorias consecutivas na actualidade. A súa anterior xornada, na que recibían ó Alcorcón, foi adiada. Hai que recalcar que o club foi sancionado con derrota por 6 – 0 e a perda de 3 puntos ó non presentarse co mínimo de 10 futbolistas na súa visita ó Ceuta. Na realidade, venceron todos os seus duelos menos dous: en casa ante Roldán (2 – 2) e en Castro de Rei (4 – 3, sen as brasileiras que estaban concentradas coa súa selección). Son o conxunto máis goleador, xunto co Futsi (70 tantos anotados, por 64 no noso caso), á vez que son o que menos recibe (25, por 34 nosos).

Na primeira volta, aínda que fai relativamente pouco (o 13 de decembro), o resultado entre ambos equipos foi de 6 – 0 a favor das norteafricanas. Así, o balance xeral é de 3 triunfos conserveiros, 3 empates e 5 vitorias melillenses. Superárannos nos últimos tres enfrontamentos, sen que lles anotásemos nin un gol. Por contra, das súas cinco visitas a Poio, só na do curso pasado levaron os 3 puntos.

Foto de Débora Braga.