Este sábado, ás 17 horas, recibiremos á A.E. Les Corts na Seca. Será o derradeiro partido de liga regular no noso pavillón.

O noso equipo vén de empatar en Ceuta, poñendo fin á xeira de oito triunfos consecutivos. Como locais, mantemos a senda de cinco vitorias seguidas. Sen opcións de optar ó primeiro posto na liga, queda asegurar o segundo, para o que debemos sumar de tres se non queremos depender do resultado do Futsi, que ten dous puntos menos. Noelia Montoro volve estar convocada, aínda que a maior noticia é o regreso de Miri, recuperada da súa lesión tras 13 meses. A súa última convocatoria fora na 26ª xornada da tempada pasada.

A A.E. Les Corts é 11ª con 33 puntos, 5 máis ca o descenso. Polo tanto, aínda teñen que selar a permanencia na Primeira División. Veñen de perder ante Ourense e Melilla. As súas últimas vitorias foron contra equipos da parte alta como Alcorcón e Castro (esta última a domicilio). Sumaron 19 puntos como locais e 14 como visitantes. Totalizan 73 goles a favor (96 no noso caso) e 71 en contra (48 nós).

Na primeira volta superámolas por 1 – 3, pero nos cinco precedentes existentes só vencemos en dous, perdendo os outros tres. De feito, gañáronnos na Seca nas súas dúas visitas (1 – 2 e 1 – 3).