O pasado 13 de xuño pechouse unha nova campaña chea de fútbol sala en Poio. Para dar voz a cada equipo, que non son poucos, faremos unha moi breve síntese de como transcorreron estes meses para cada un deles:

• Sénior Feminino: o noso buque insignia segue batendo rexistros e consolidándose como un dos mellores equipos de España. Na presente campaña acadouse a final da Copa Galicia e as semifinais da Liga e da Copa da Raíña. O primeiro título nacional segue resistíndosenos, pero ben certo é que a dificultade para logralo é máxima, pois estamos na mellor liga do mundo.

• Sénior Masculino: o 2026 quedará gardado na memoria do club como o ano do ascenso a Terceira División Nacional, categoría que se alcanza por primeira vez, e do debut na Copa Galicia (á que volveron clasificarse). Tal fazaña certificouse no playoff de ascenso, repetindo os pasos do curso anterior, aínda que desta vez con mellor sorte na final.

• Sénior Feminino B: o filial conserveiro regresaba á súa categoría teito, a Preferente Galega. Nela desenvolveron unha gran campaña, que pecharon no 7º posto con 50 puntos.

• Sénior Masculino B: neste curso debutou o segundo equipo masculino, na última categoría, a Segunda Futgal, que remataron na 2ª posición, cos mesmos puntos ca o campión. A sorte foi esquiva, xa que na Copa tamén quedaron subcampións.

• Sénior Feminino C: un ano máis contamos cun terceiro equipo feminino, na Segunda Futgal. A liga separouse nunha fase previa, que remataron segundas, e unha competición regular no grupo polo ascenso, onde finalizaron terceiras.

• Xuvenil Feminino: comezamos as categorías base cun primeiro posto na fase de grupos e derrota nas semifinais da Liga Galega para as mozas xuvenís.

• Xuvenil Masculino: gran tempada que se saldou co ascenso a Preferente Galicia, despois de gañar a liga de Primeira Futgal en Pontevedra e superar posteriormente a fase de ascenso. Os rapaces non puideron certificar o dobrete coa Copa, na que perderon a final nos penaltis.

• Cadete Feminino: subcampioas do Grupo 2 da Liga Galega, o equipo cadete caeu na final ante as súas predecesoras. Na Copa, tras seren primeiras de grupo, tamén quedaron ás portas do título ó non poder vencer a final.

• Infantil Feminino: tamén foron segundas no seu grupo da Preferente Galicia, pero ó contrario que as cadetes, non alcanzaron a final tras perder nas semifinais ante o Fisober. Porén, na Copa non só acadaron a final, senón que tomaron a revancha co equipo de Dumbría e levantaron o título.

• Infantil: éxito dos infantís ó gañar a liga de Pontevedra en Primeira Futgal, o que significa o ascenso a Preferente. Na Copa, pola contra, non puideron superar a fase de grupos.

• Alevín Feminino: competición moi digna cun 4º posto no Grupo 2 da Preferente Galicia, o que valeu o acceso ás eliminatorias polo título, nas que non puideron continuar. Na Copa avanzaron como segundas na fase de grupos e tamén superaron os oitavos de final. O Saraiba do Mar poría o punto final ó curso tras eliminalas en cuartos.

• Alevín A: moi meritorio subcampionato de liga na Primeira Futgal de Pontevedra. Na Copa, malia o bo rendemento, non puideron acceder á final desde a fase de grupos.

• Alevín B: mesma liga ca os de segundo ano, pero neste caso con máis dificultades. Décimo posto na táboa, mentres que no grupo de Copa non lograron puntuar.

• Benxamín Feminino: nunha pouco concorrida Liga Galega, foron cuartas e disputaron a semifinal, na que caeron ante o Saraiba do Mar.

• Benxamín A: clasificaron como segundos no seu grupo na fase previa de Liga, para despois seren campións do Grupo 2 da Liga Regular, con pleno de vitorias. Na Copa, pasaron como primeiros do seu grupo para certificar o dobrete na final ante o Saraiba do Mar.

• Benxamín B: foron primeiros na fase previa de Liga con pleno de triunfos. Despois, no Grupo 1 da Liga Regular, finalizaron terceiros. Na Copa, novo 100 % de vitorias no grupo, pero caeron na semifinal, evitando así que a final fose entre os dous equipos conserveiros.

• Prebenxamín A: catro vitorias sen encaixar goles déronlles o primeiro posto na fase previa ligueira. Despois, no Grupo 1 da Liga Regular, remataron cuartos. No torneo copeiro, segundos no seu grupo e, finalmente, subcampións do mesmo.

• Prebenxamín B: un pouco ao contrario ca os seus compañeiros de idade, comezaron a fase previa cun terceiro posto. Despois, gañaron a Liga Regular no Grupo 2, cedendo tan só un empate. Na Copa, superaron con pleno de triunfos o seu grupo e caeron na semifinal ante o noso Prebenxamín A.

• Biberón A: campión da Liga de Pontevedra con todos os seus partidos gañados, encaixando unicamente un gol. Na Copa, mesma senda triunfal no seu grupo para certificar na final o dobrete.

• Biberón B: catro puntos lograron sumar na Liga, aínda que non puideron abandonar a última posición. Mesma traxectoria no grupo de Copa.

Desta forma, conseguimos dous dobretes de Liga e Copa, grazas ós equipos Benxamín A e Biberón A. Como campións de Liga temos ó Xuvenil Masculino, Infantil e Prebenxamín B. O oitavo entorchado, un campionato de Copa a nivel galego para o Infantil Feminino. Ademais, no apartado de ascensos, destacan os do Sénior Masculino e Xuvenil Masculino.

Obviamente, aínda que falamos de todos os resultados e clasificacións, referímonos á base, na que o primordial é aprender e adquirir valores, máis alá das vitorias e das derrotas.