A sexta xornada de Primeira División lévanos a descubrir un novo escenario, o Palacio de Deportes de Chapín, en Jerez de la Frontera. Non porque o rival sexa novo, pois xa coñecemos ó CD Guadalcacín, senón porque se trasladan a este recinto para favorecer un maior ambiente e espectáculo ó tratarse dun encontro retransmitido en directo por Teledeporte (sábado, 11 horas).

Actualmente somos sextas na clasificación, con 8 puntos. Iso si, o playoff está a catro de distancia, polo que é necesario sumar os tres puntos para non afastarnos das posicións obxectivo e, de paso, romper a xeira de tres partidos sen gañar en liga (si que conseguimos entremedias un triunfo na Copa Galicia). Como sinalou Laura Sánchez na previa, o xogo é bo e os resultados chegarán. Na convocatoria mantéñense as baixas de Èlia e Yanira.

O Guadalcacín ocupa postos de descenso (14º con 3 puntos). Porén, vén de vencer por 1 – 2 ó Aldelis Zaragoza, pechacancelas, logrando así a súa primeira vitoria. Antes, perdera fronte ó Alcorcón, Ourense, Castro e Roldán, sempre con resultados moi axustados.

Existen oito precedentes entre ambos clubs. En Poio sempre gañamos. En cambio, en Guadalcacín, nunca (3 empates e 1 derrota). A ver se o cambio de pavillón nos trae a primeira vitoria ante as xerezanas como visitantes.