A pasada fin de semana, con motivo do Entroido, serviu de parón para numerosos equipos do clube. Non obstante, aproveitouse para recuperar algún partido pendente e poñer punto e final ás ligas do xuvenil e alevín femininos, que onte martes sumaron as súas dúas últimas xornadas en formato concentración:

Sen dúbida, a peor nova foi a derrota nos penaltis do noso buque insignia, o sénior feminino, que quedou eliminado en oitavos de final da Copa da Raíña ante o Sala Zaragoza, logo de rematar o encontro con empate a dous goles.

O noso sénior masculino igualou a tres tantos ante o Vila Termal Cuntis e cortou a súa mala xeira de seis derrotas consecutivas.

O xuvenil feminino sumou un triunfo e un empate que lle vale para quedar campeón desta breve e curiosa liga.

Non correu a mesma sorte o alevín feminino, que remata en segundo posto polo golaveraxe ante La Peña.

Por último, tanto o cadete feminino coma o benxamín colleitaron cadansúa derrota, sendo o partido dos máis pequenos un adiado que tiñan pendente de recuperar en Vilagarcía ante Salnés Futsal.