Coma nos ten acostumados o 2024, volve a liga, que practicamente se xoga cada dúas semanas. Viaxaremos ó pavillón Guadaljaire de Málaga para enfrontarnos ó Atlético Torcal, 12º clasificado de Primeira División (sábado, 18h).

Prolongouse o noso momento doce na tempada coa consecución da nosa cuarta Copa Galicia a semana pasada. Nun moi igualado derbi ante o Marín Futsal, vencemos por 2 – 1 (na prórroga), encaixando un gol por primeira vez en catro partidos. En liga enlazamos sete triunfos seguidos, o que nos permitiu conseguir praza no playoff, aínda que cos mesmos puntos que o Alcorcón. Por iso, non queda outra que seguir gañando se queremos depender de nós mesmas, sexa o rival que sexa.

O Atlético Torcal será un rival durísimo, pois gañou os seus últimos catro partidos, sendo o terceiro equipo máis en forma do momento (por detrás do Burela e de nós). De feito, veñen de conseguir o resultado máis avultado de toda a campaña, un 1 – 10 na pista do Viaxes Amarelle. Con 76 goles a favor, 6 máis que nós, son o cuarto equipo máis realizador. Destaca África Lozano con 19 goles anotados, cuarta na lista de goleadoras. Iso si, recibiron 69 tantos (por 46 no noso caso). A súa gran segunda volta permitiulles deixar a 11 puntos os postos de descenso, polo que o obxectivo da permanencia no seu regreso á máxima categoría está practicamente pechado.

Na primeira volta vencemos por 3 – 1 con dous goles no último suspiro do partido. Como antecedente está o curso 2021 / 2022, no que empatamos a tres goles na Seca e gañamos por 0 – 3 en terras malagueñas.