Está de volta a Primeira División despois do parón para a concentración de seleccións. Tocará viaxar ata o pavillón Eva Manguán de Móstoles (sábado, 18:30h) para pechar o mes de outubro o mellor posible.

Trala derrota en casa contra Les Corts ampliouse a distancia respecto do playoff a seis puntos, pese a que seguimos no quinto chanzo da clasificación.

O conxunto de Patri Chamorro goleou por 9 – 1 ó Marín na pasada xornada, conseguindo a súa segunda vitoria, ambas en casa e seguidas. Son novenas, con sete puntos, tres menos que nós. Suman 17 goles a favor (2 máis que no noso peto) e 11 en contra (1 máis que no noso caso).

Cinco triunfos consecutivos acumulamos contra o Móstoles actualmente. En total enfrontámonos en Primeira División 21 veces, con 15 vitorias vermellas e 6 branquinegras.