Nova proba de máxima esixencia para as nosas futbolistas, que visitan ó terceiro clasificado en liga, o Roldán (sábado, 11h). Este será un partido histórico, posto que por primeira vez Teledeporte emitirá en directo un partido de Primeira División feminina de fútbol sala.

No referente ó deportivo, ambos conxuntos queremos lamber as feridas da Copa da Raíña, da que os sempiternos favoritos nos apearon. Pasar o loito, como sinalou Sandra Buzón na previa, é imprescindible para afrontar outro durísimo partido no que intentaremos gañar por terceira vez seguida en liga e poñernos con 15 puntos, a un do propio rival. Cabe destacar o gran momento de forma de Laura Uña e Saki, que enlazan tres partidos consecutivos marcando. Manteremos as baixas de Anna e Marta.

Por parte do equipo de Torre Pacheco, veñen de caer na Copa contra o Futsi, pero coma nós, suman dúas vitorias seguidas en liga. Avantáxannos en catro puntos, estando no terceiro chanzo da táboa e destacando como o equipo menos goleado (9 tantos recibidos). No seu pavillón, venceron os tres partidos que desputaron.

A bagaxe de resultados entre ambos clubes en liga é de 7 vitorias vermellas, 3 empates e 9 triunfos murciáns (aínda que lles vencemos no único duelo en Copa da Raíña que xogamos). Na tempada pasada levámonos os puntos en ambos enfrontamentos por primeira vez, curtando a xeira de tres campañas sen gañarles. En Roldán, conseguimos 3 triunfos e 1 empate, perdendo os restantes 6 encontros.