Na tempada do noso 25 aniversario propuxémonos seguir crecendo, con ambición e buscando rachar novas barreiras. E a pesares de que só transcorreu un tercio da liga, a parte que podemos considerar de inicio, son dous os rexistros que sobrepasamos.
O primeiro, como ben adiantou o Diario de Pontevedra, logrouse coa vitoria en Zaragoza na novena xornada e significaba o mellor arrinque de competición nas dez campañas que cumprimos na elite do fútbol sala feminino. Con 24 de 27 puntos posibles, superábanse os 22 de 27 colleitados nas campañas 2017 / 2018 e 2020 / 2021. A isto engadimos o último triunfo, en casa ante o Leganés, para conquistar así 27 puntos de 30 posibles no actual curso.
De feito, esta case impoluta estrea ligueira fundaméntase noutro récord. Tras vencer na xornada inaugural e caer na posterior visita ó Futsi Atlético Navalcarnero, o equipo enlaza oito vitorias seguidas, xeira nunca antes lograda na máxima categoría. Deixamos atrás os sete partidos que se gañaron de forma consecutiva na tempada 2017 / 2018, un ano no que alzamos a nosa segunda Copa Galicia e ó que lle renovamos os seus rexistros.
Agora, é momento de continuar a magnífica xeira e poñela a proba nos esixentes tres partidos de liga que nos quedan por diante en 2022: derbi co Ourense Envialia, recibir ó Roldán e viaxar a Melilla.